Gourmanchéma

Evening

N tie ô n Tienu, yua n jigidi o nunga a po ki tieni o dandanli a bonŋanla ŋanma leni a ŋampaabu duagidima nni. Da tuo, n miadi ha, min fagidi leni a niñingbadima buliñobu ki da ŋa nni a tagima yaaba n yie a Jaanma nu nni.

N tie, ô n Tienu, a ŋoadikoa leni a ŋoadikoa bijoa. N tuo a moamoani a dana nni, n ta n taana ki cuubi a taanyema bakunu, n siedi ke a tie a bebe ki go tie yendo n go daani a sugili. A pia o fidu ki ba tieni yaala n naani ke li ŋani a po ; Tienu to ki ye ke laa tie fini, ti yenpagidi daano, yua puuni sugili kaa gbendi.

Children

N jaanda, ô n Tienu, leni han fundi nni ki go cedi ke n yantiali guani. Nani n nunga n jigidi ki nua a duagidima tiŋaagu ŋmabiga yenyencianma yua n yendi a fidu leni a bali tawala yeni, n fundi o tiŋaagu ne ki bandi a maalima, ki du a Tili po ki go luo ŋama a baabu kani.

N miadi a, a jagili fidu po leni a kpajala fidu yua ki pia yiema po, han cedi han waani nni ya duagidima n guama nni n tua mi cili moanma a buama diedi po, yaala n wuo a buakaaba pala nni, leni ya tuonsoantiagu n ŋani ki cie ki baa duagidi a buadingima leni a ŋanma maalima.

O n diedo, leni a tidianmuanu yua n ŋani ki cie, pa nni ya handuna n te ne leni o handun yendo piama. N siedi ke bonli kuli gobidima ye a nu nni. A gobidi ba han bua maama. Tienu to ki ye ke laa tie fini, o gbamandaano, yua ki lebidi.

A tie yua, n baa fidi o jagili po, ki lebidi i fe n tua ti yenpagidi, ti tadindi n tua o gbamanu, mi gbalima n tua o fidu, ti jawaandi n tua li papaali ke sika mo n tua ti dugidi. Tienu to ki ye ke laa tie fini, o fidu daano, o ŋanbido.

A kan yie o ba kuli po yaaba n linga nni a kan paadi lena yaaba n bua nni. Jagi n po yaala dagidi leni a paabu tawala leni a ŋampaabu ñincianma. A tie, imoamoani po, o fidu ciamo daano, o gbamanciamo daano.

The Departed

N ba tieni lede ki sugini mi guama, ô Utienu, n Tienu, ki nan sua ke yaaba n naabi ki ba pundi a kani nua kelima bi paadi leni fini ; n go ba tieni lede ki fidi ki tandi n ba ki baa fuodi, ki nan sua ke yaaba n bua ha naani ye fala nni kelima bi fagi leni fini ?

N tieni, ô n diedo, n yanfuoma leni n moano kuli a guudima leni a fidu nujienu nni ; a fidu po, n ba bili n yuli li yukuli po ki go fiino a jagili leni a buama po. A tie imoamoani yua n gu, yua n guudi, o fidu kuli daano, o gbamanciamo daano.

A fidu po ! n li miadi, n guama nni bi n ya nua, han bua yaala. N tie a ŋoadikoa ki go ye a nu nni. Todi nni leni a ŋampaabu min suani yaala n ba yadi a buaŋanma tulale. Lani n tie n dandanli leni yaaba n ku a kani dandanli.

Ti pagidi ye lena, ô ŋanduna nba kuli diedo !

Obligatory Prayers

Yedi : Utienu dagidi bonli kuli po, ki cie bonli kuli. Li ba kuli ki ye tanpoli, bi tingi nni, ki baa dagidi kaa tie Utienu.

Imoamoani po, o tie wani o ba, yua n bani, yua n todi, o gbamanciamo daano.

Detachment

N Tienu, min jaani yua, n bado, n buado ! o le lanbu n ba fidi ki togidi n jaandi a po ? mii bi pia yantiali, a fandi nni. N bi fagidi n yuli lena, a todi nni a ŋanma po ke n guani a kani. N bi tie nani kuuma. A fiini nni leni mi yema ñima. N bi kuodi, a faadi nni leni a maama ñincianma yua ñani a niñingbadima tidianmoanu kani.

O utienu gobidima ! yema kuli ñani a ŋanma kani ; da cedi a ŋanma paabu n puado ki da go fagido leni a niñingbadima ñinbuanma. N miadi a han todi nni ki go faabi nni o yogu kuli leni min ye leni maama kuli n go miadi, a ŋanma tanpoli, a todima yua waagi ki ye.

A tie, imoamoani po, o diedo yua puuni leni yaa diema n kan gbeni faabada bado.

Firmness in the Covenant

A yeli n ba ti kpiagidi, ô o Diedo n Tienu! N tie a ŋoadikoa yua n juani a niñingbadima baabu ki se a paabu bulñobu kani ! N miadi a, a yeli yua n cedi ke bonli kuli ŋoadi a, nunbu n nua yaala leni bun kan fidi ki la yaala kuli, yeli yua po ke mi yemoanma fawaama yadi a tagima kuli po, han pa nni o gbamanu a fidu yua tandi ki tinga leni tanpoli po, ki go guudi nni leni yianu leni yanyagidi kuli. N siedi ke a tie a yela kuli Diedo leni yaala n ŋoadi a pabuama kuli jagidaano. Utienu toa ki ye ke laa tie Fini, O Fidu kuli Daano, Yua pia labaali, O yanfuodaano.

Jagi n po, ô n Diedo, yaala n ba pia n po ti ñuadi a handuna nba kuli nni. Pa nni lanwani han niani yaala han gandi yaaba a tagima nni po, yaala ke yua yini ti buudi sugidi, bi o niyiekoa lanbu, bi ya pala n fagi leni A joagindi ki fidi ki cedi ke baa jigidi a po.

Imoamoani po, a tie Yua todi fala nni, a bali fidu po. Utienu toa ki ye ke laa tie Fini, Yua kpedi ki cie, o fidu kuli Daano.

Detachment

Ti yenpagidi ye leni ha, ô o diedo n Tienu ! n jaanda leni han puni nni o sanu ke n bandi fini a ba duagidima leni han ñani nni a nanditieba siiga ; leni han duagidi n nuni po bi biadima leni bi tuadi biada a dana nni, leni han faabi nni ki ñani bi buama kuli n kani ki cedi ke n jigidi cain ki nua a todima leni a ŋanmpaabu ŋanma po. N jaanda goga leni han jiini n po, a jagili tawala nni, yaala n guuni nni leni yaaba n yie ha maadidenli leni a nibiada makpanjama, ki cedi ke n fidi ki sieni n pala cain a po ki sani ki fagidi leni yaaba n yie ke bi kan bandi a nunga yenyenma. N tuondi ha go ga leni han puni nni o fidu ke n sedi cain a buama nni, ki kpaani a dondili ki go kpiagidi a tuada. N go tuondi ha leni han ñuni nni a niñingbadima yiega kani yua n cie yaala n nuadi leni yaala n ki pia lama kuli.

A tie yua n kpedi boncianla, yua ya yenpagidi n yabi, yua ya yenpagidi n yabi leni yua n bua boncianla.

Forgiveness

Tiladi jaanma yua n kobi ke bi baa tieni o yenma o yensiinu piiga n kudi lie kaa ca ki yienga kuama.

N tie siedi ô n Tienu ke a tagi nni ke min bandi a ki go ya jaandi a. n tuo moale ne n tadingu leni a fidu, n luoma leni a piama. Tienu toa ki ye kaa tie fini, yua n faabidi, yua n ye o yuli po.

Obligatory Prayers

ŋme ke laa tie Utienu n ba fidi ki dingi yaala n pa ? Yedi: Utienu n ba ti pagidi ! wan bebe n tie Utienu ! ti kuli tie o ŋoadikaaba ti kuli ye o mabilikaama po.

Evening

Ti yenpagidi ye leni a, ô o diedo n Tienu ! N miadi ha a nigandikaaba po, ban yaaba ya po ke a piani a danligu, leni yua ke ha gandi wan tua a kawe n ba leni a tonda juodima, han cedi a tiadima n tua n yegininlielo, a buama n tua n kpajali a nunga n tua min sugini yaala ; ke a yeli n tua n fidisanga, han bua yaala n tua min naabi yaala po ke a yanbuama n tua n pamanli.

N tie tuonbiadi daano, ô n diedo ke a mo tie yua n, puuni sugili, kaa gbendi. Min li bandi ha ya yogunu, n jaligi ki nagini a ŋanma yua dingi buliñobu yua n kpedi kani.

O n diedo, tieni sugili n po yaa tudima n cedi ke mii fidi ki ŋoadi a buama sani ki go cedi ke n gbali ki pundi a taanyema bakunu.

O bakuli ki ye ki baa kubi nni leni o ŋampaabu, o bakuli ke n ba fidi ki jigidi n nunga o po, wan gbadi n po mi ninñima, bi yua ke n ba fidi ki mia mi niñingbadima. Da yie nni, n miadi ha, ki fagidi nni leni a todima, han da muni nni a ŋanma leni a todima ñingola.

Pa nni, ô n diedo, han bili yaala yaaba n bua ha po, ki go diani n po han diani yaala a nigandikaaba po. N nuni diidi o yogu kuli a gobidi ŋanma bianu, ke n nuni diidi a niñingbadima buliñobu.

Tieni n po maama n mani ha. Tienu to ki ye ke laa tie fini, o fidu Tienu, ti yanpagidi Tienu yua ke bi niba kuli miadi o faabima.

Evening

A yeli n ba ti kpiagidi, ô n Tienu leni bonli kuli Tienu, n Yenpagidi leni bonli kuli yenpagidi, n Buado leni bonli kuli buado, n Paalu leni bonli kuli paalu, n Bado leni bonli kuli bado, n Diedo leni bonli kuli diedo, n Juodima leni bonli kuli juodima, n Buobuodo leni bonli kuli buobuodo. Da tuo, n miadi ha, ke min fagidi leni a niñingbadima kpenciamo bi mo min paadi ki fagidi leni a naginma ñinkunu.

O ba kuli kaa tie fini, ô n Tienu, ki pia n po ñuadi ba, ki baa nagini toa kuli ke laa tie fini kan fuoni nni leni li ba kuli. N miadi ha, leni a piama yabinu yaala n cedi ke a diedi a yuli leni bonla kuli se fini a ba, han taani nni leni yaaba n jigidi bi nunga a po ki fii ki baa suani a po.

Tieni sugili, ô n diedo, a ŋoadikaaba jaba leni puoba po. A tie imoamoani po yua n, puuni sugili, o yogu kuli. Yua n mua mi ninñima ki cie.

Aid and Assistance

ŋalibarka ye ya kaanu, leni ya diegu, leni naankani, leni ya dogu, leni ya pali, leni ya juali, leni ya wuonkaanu, leni ya dieyaanli, leni ya fuanu, leni ya diema, leni ya ñinbuanma, leni ya kpendegili leni ya fuali, naani ke bi ta Utienu yeli ke o donda ba ti kpiagidi.

Families

A yeli n tie n paagima, ô n Tienu ke a tiadima tie n ñogu. Ki yaa ku a kani n tie n dandanli, ke n buama a po tie n yegininlielo, a niñingbadima n tie n paagima leni n todikoa o na ŋanduna nni leni o ŋandunyendo mo po.

A tie imoamoani po mi ŋanma kuli Tienu, yua bani li kuli, yua ya yanfuoma n ki pia bianu.

America

O n Tienu, n canba ! n tie a ŋoadikoa leni a ŋoadikoa bijoa. N fi ki ŋan n duanu a yenda, yaa yogunu ke a taanyema tiŋaagu ŋmabili pudi a jagili tiŋafaama yogunu ki yadi o yenyenma ŋanduna kuli po, nani lan bili maama a ñomaama Tila nni.

Ti pagidi ye lena, ô n Tienu, leni tin fundi a banma yenyencianma yendima nni. Jiini ti po, ô n diedo, yaala n baa todi ti tin yie yaala kuli n ki tie fini ki go ba ga ti bonli kuli lolima kani, se fini. Bili ki pugini, min faadi yaaba po, n niba po, jaba leni puoba, leni n yuli po, yaa handuna n te ne lene o yendo mo piama.

O fini mi tagima kuli buadi-hamo leni handuna kuli n bua yua, leni a guudima yua kan gbali po, guudi ti leni yaaba ka tieni mi biadima tuonsoantiadi yanfuoma ke bi suabidi bi niba pala nni. A pia o fidu ki baa tieni han bua maama. A tie imoamoani, o fidu kuli daano, yua n faabidi fala nni, yua n ye o yuli po.

Tieni balika, ô o diedo n Tienu, yua ya po ka puni a jigi ciandi leni yua po ka paadi bi niŋanba leni a nibiada, ki todi ti a ŋanma po tin yaa tiedi han bua yaala leni han sugini yaala. Tieni balika ki pugini ô n Tienu, yaaba n tie a maama leni a diani po, leni yaaba n jigidi a po, ki pegidi bi nunga ki nua nunga ki go cengi a yiini po.

A tie imoamoani po bi niba kuli diedo leni bi bado fini n go kubi o fidu bonla kuli po.

Families

Ti yenpagidi ye leni ha, ô o diedo n Tienu ! N miadi ha, a yeli yua ya po ke yua n tie a ŋamu kali a jaanma kpagili po leni a yeli yua ya po ke a lebidi bonli kuli ki taagi bonli kuli, ki cedi ke bonli kuli togidi o kubili, ki puuni bonli kuli, ki kubi ki go todi bonli kuli, n miadi han guudi o ŋoadikoa pua ne yua n sani ki gedi a wuonkaanu ki lingi han duagidi yua ya ninni guudima ki tieni a po o dandanli leni o dugidi kuli.

O yia, ô n Tienu, o kua a paagima tibu soangu nni ; ki ye fala nni, o sani ki gedi a guudima dogu nni ; i duoli n nando, o lingi a todima ñinbuli ; ki ye li cuagicianli nni, o jaligi ki pundi a yanduama caali kani ; ki tugi ti tuonbiadi, o jigidi o nunga ki nua a sugili buliñobu kani.

Yieno , a bali leni a ŋanma yua dingi po ô n Tienu leni n buadi ŋamo, a fuodima leni a paagima kpalibu ki go ñani o ñoñuulu a niñingbadima leni a todima bonñokaala nni. Guudi o, go ga, cuagili leni fala kuli po, yanbani leni yianu kuli po leni han ki bua yaala kuli po.

Imoamoani, a yabi ki cie bonli kuli cain, se fini a ba. A tie imoamoani po yua n paagidi, yua n dagidi bonli kuli po, yua bani li kubili, yua puuni sugili kaa gbendi, yua ya niñingbadili n yabi boncianla.

Divine Springtime

A yema yua ki pia bianu ñingola yua pia tulale nni cedi mi ño, ô n Tienu, mi yema tibu bonluonkaali nni pa nni o sanu min leni, ô n dandanli.

A buama ñinbuli yua ŋani cain nni pa nni o sanu min ñani n ñuñulu, ô n yenpagidi, a gobidima yua kan gbeni suangu nni, cedi min yaa ye, ô n yenyenma.

A naginma naga nni, a kani, cedi min yaa goadi, ô n buadi ŋamo ke a niñingbadima kpagili jienu po, cedi min kali, ô n buado.

Cedi ya fawadingima n pia a pamanli tulale n figi n po, ô n yema kpajali, ke a moano alijani ciamo nni min ba ki kua, ô min jaani yua!

Cedi min cengi ya yanmanu ka taanyema nuanga yiini, ô fini yua n yendi, a gbamanu leni a fidu yanfuoma po, pa nni li miali, ô fini n ŋanbido.

Ke min sedi o yogu kuli a buama yanfuoma nni, ô n todikoa, ke n tayaga n ba o gbamanu a yanbuama sanu nni, ô n tagido.

A yema yua ki gbendi nagili nni, a ye kaanu, cedi min yaa ye faabada, ô fini yua pia mi niñingbadima n po, a yenpagidi kpagili po kaani nni, ô fini yua n tie n canba!

A buadingima tanpoli po yugidi nni, ô fini n buobuodo, a sanu tiŋaagu ŋmabiga kani gedini nni, ô fini yua n dadi nni.

A yanfuoma yua ki pia lama duagidima yogunu yiini nni, ô fini yua n cuani nni mi yema nni ki go tie n buaciama kpajali, a moano ŋamu tulale yua ke a bua ki duagidi kani, cedi min gua lebidi, ô fini yua n tie n Tienu!

A pia o gbamanu ki ba tieni han bua yaala. A tie imoamoani po yua n kpedi boncianla, ti yenpagidi kuli daano, yua n yabi ki cie.

Families

A tie, ô n Tienu, yua ke o yela kpendini mi paagima a yiama po, laafia a tadima po, mi dingima yaaba n pia o ñoñuulu po, mi yanduama ya naani n ye li cuagili nni po, o sanu yaaba n bodi po, ti kpiagidi yaaba n miidi po, mi piama a luoda po, mi gbadima yaaba n ki bani po, mi yenyenma ya pala n boani po, li pamanli yaaba n ye fala nni po, mi wulima ya pala n kuugi po, mi yulolima yaaba n ye ti yonbidi nni po. A yeli po, ô n Tienu, mi tagima kuli ŋmiagi, tanpoli poabidi ki tandi, ki tinga tagi, a tawala fii, mi tañima wuli ki tinga po. Lan, tie imoamoani po, a ŋanma siedo a tagima po.

Lani ya po n cedi ke n miadi ha a yeli po, yua ya po ke a duagidi a yuli ki yugidi a jaanma a tagima kuli yuli po, a yeli yua ŋani ki cie kuli po leni a yela yaaba n gbengi po, leni a tuadiŋama yaaba ke bi kubi ki kpiagidi a moano yua yabi ki cie ki go kpedi po, han jiini o ñiagu ne, a niñingbadima tawala po, a paagima tañima, ki canpandiga ne po yua ke a taani leni a moano yua pia ti yenpagidi ki cie, a tagima diema nni. Yieno, ô n Tienu, leni laafia leni mi yemanma kpalibu ki guudo, ô n buadi ŋamo, leni yanbani leni yianu kuli, leni han ki bua yaala kuli. A gbamanu, imoamoani po da leni bonla kuli. A tie imoamoani o fidu kuli daano, yua n ye o yuli po.

Pa o ki pugini, ô n Tienu, ya ŋanduna n tie ne leni ŋanduna yua kpendi leni ya jamaano n pendi leni ya jamaano n kpendi piama. A fidu leni a yanfuoma imoamoani puni ha li sanu.

Divine Springtime

O n diedo ! Cedi ha ŋamu n tua n jiema, a naginma n bonñukaala, yaala n mani a po n dandanli, a dondili n tuonli, a tiadima n yegini lielo, a bali fidu n gaa po, a ye kaanu n diegu, ki cedi n diegu n tua ya kaanu ke a ŋuudi ki ñani ya bonpankaana ke a tieni yaaba ya po ke a caba paadi ba leni fini.

A tie imoamoani po o fidu kuli daano, yua ya yenpagidi n ki pia bianu, o gbamandanciamo.

Detachment

A yeli n ba ti pagidi, ô o diedo n Tienu ! A tie yua ke bonli kuli ŋoa ama aa ŋoa o ba kuli, a tie bonli kuli diedo ama oba ki die ha. A bani bonli kuli ama oba ki bani ha. A bi bua bi niba n bandi ha, lan ya po n cedi ke, leni mayenma yua ñani a ñobu nni, a tagi ŋanduna ki go ma o. tienu to ki ye ke laa tie fini, o bonmaalo, o tagido, yua kpedi boncianla, o fidu kuli daano. N miadi ha, leni laa maama yua n yendi a jagili bianu po, han cedi min ñu laa ñima yua puuni mi yema yaama ke a ta ki faadi a nigandi kaaba pala ki go fundi yaaba n bua ha naani, lani n tie min fidi o yogu kuli leni min ye leni maama kuli, ki jigidi n nunga ki nuanli a bebe kani.

A tie o fidu, ti yenpagidi leni o ŋanmpaabu Tienu. Tienu to ki ye ke laa tie fini, yua kubi li jagili ki cie, ti yenpagidi daano, yua n bani li kuli.

Detachment

A donda, ô n Tienu, a po fini yua n tie i jigi leni ti yenpagidi kuli, o yabinu leni ti kpiagidi, li bali leni mi diema, o yabinu leni mi ŋanma, li fangili leni o fidu ñinbuli. A caani han bua yua a kpenciamu kani, yua n mani a po, a kpiagido wan bandi a yeli yua waagi ye. Yaaba n ye tanpoli leni tingi nni kuli, o ba kan fidi ki mua leni a bali jagili tuonli. O yogu kuli a gobidi mi tagima kuli ki go li ba ya tuuni faabada leni a fidu yaala n ye kuli po. Tienu to ki ye ke laa tie fini, o fidu kuli daano, ti yenpagidi daano, o gbamanciamo daano, yua ya yanfuoma n kan gbeni.

Yendi, ô o diedo, a ŋoadikaaba nunga ban fidi ki laa ha ; ŋuudi bi pali ban fidi ki jigidi a tanpoli ŋanma cancanli po ban go bandi yua n tie fini a ba duagidima leni a moano tiŋafaama.

Imoamoani po a tie ŋanduna n ba kuli diedo. Tieni to ki ye ke laa tie fini, yua ke bi kan fidi, yua n fidi.

Divine Springtime

Pa nni ya pali n pieni, ô n Tienu ki lebidi ki pan ni ya yantiali n dua, ô n dandanli ! A fidu yanfuoma po, pan ni o gbamanu a jaanma nni, ô n buadi ŋamo, a yenpagidi yenyenma n duagidi n po a sanu, ô fini, n buama kpajali !

A ŋanma fidu yua n cie po, fiini nni min pundi a ŋamcain tanpoli po, ô fini yua n tie n moano buli, leni a yema yua ki pia bianu fawadingima po mangi n naano, ô fini yua n tie n Tienu !

A yanmani yi kan gbeni n cuani n po mi yanduama, ô n yegini lielo; a nunga yua n waagi ye n gaa nni yaala n ki tie fini kuli kani, ô n canba, ke a moano yua kan lebidi duagidima labaali mano n gbieni nni leni li pamanli, ô fini, yua n duagidi ki cie yaala n duagidi kuli, fini yua n wuo ki cie asili kuli.

Divine Springtime

Ti yenpagidi ye leni ha, ô o diedo n Tienu! N jaanda leni han yini nni mi yema nni a dana nni leni han piebi n niini a buama leni a banma.

N miadi a yeli po yua ke, a ŋoadikaaba yaaba n ku leni ha pala piama nni, yadi a maama yanfuoma laani yi pia ki dunga, yua ke a yeli, o niñingbadilo tiŋaagu ŋmabili, yadi o yenyenma yaala n ye tanpoli leni tingi nni kuli po, n miadi han pa nni, a ŋanma leni a ŋanma paabu po, a paabu yua ŋani ki go wuo.

N cici dana n ne, ô n Tienu, ke a taani leni a dana cele. Moala han ji puni nni laa kpiagidi yua yabi yeni, daa yie n po han bili yaala a nigandi kaaba po.

N li tie, ô n Tienu, bonbili yua n wa ke a coagi a buama tinga nni ki fiino leni a ŋanmpaabu nu. Lan ya po yo ke laa bonbili, o moano tugu nni, o sugini a niñingbadima ñima leni a todima ñinbuli yua fo. Jiini o po, a buadingima tanpoli po, yaala n ba cedi wan tieni mi puuma a suangu nni a diegu nni. A tie yua ke, leni a baciandi ñima leni a ñinbula yaaba n fo, kpidi yaaba n bandi ha kuli pali.

Ti pagidi ye leni Utienu, ŋanduna n ba kuli diedo.

Families

Han ba ti kpiagidi, ô o diedo n Tienu! N miadi a, a yeli yua yabi boncianla po yua ya po ke a puni a ŋoadikaaba li miali ki ma a dogi, a yela yaaba n ŋani ki cie leni a yela yaaba n yabi ki cie po, han todi a nibuolu ban jigidi a ŋanma yua ki pia bianu po leni a yanfuoma diegu kani. Paagi ya duoli, n ña I kaani kuli, ki mua leni i naani ki cedi ke bi kan fidi ki jigidi bi nuni ŋalijani yua n ye a yeli yua n gu soangu nni, yeli yua ke, a jagili po, tie a yela kuli bado yaaba n ye tanpoli leni tingi nni po. A pia o fidu ki baa suani han bua maama. A yela kuli diema ye a nu nni. Tienu to ki ye ke laa tie fini, o fidu daano, o yanfuodaano.

N tie tagima yua n luo, ô n diedo ki loli n yuli a piama kani. N yia hali boncianla ki muubi ŋama a paagima baabu. Ga nni ya duoli n gaani ki cebini nni kani, ŋuudi nni cain leni a ŋanma leni a niñingbadima ñima, yieni nni laafia kpalibu a sugili leni a ŋampaabu po. tegini n nualima a po ki ga nni yaala n ki tie fini kuli lolima kani. Todi nni min suani han bua maama ki go tieni yaala n mani ha.

Imoamoani po a tie ya yema n tie ne leni ya yema n kpendi diedo. A tie imoamoani po yua puuni sugili o yogu kuli, yua ya niñingbadima n yabi boncianla.

Firmness in the Covenant

Ti yenpagidi ye leni fini, ô o diedo n Tienu ! A ŋanma yua yabi boncianla tawala nni jiini, n miadi ha, ya tañima n ba ŋuudi a ŋoadikaaba pala ki ñani yaala n cedi ke bi kan fidi ki le a nunga ki go jigidi a po, lani n tie bi kuli, n fidi ki bandi yua n puni ba ti tagidi, bi tagido.

Todi ba lanwani, ô Utienu, ban pundi, a bali fidu po, yaa sienu n ba cedi ban gagidi o nuulu bedingu, leni yua n tugi a yeli yua pia ti yenpagidi ki go kpedi boncianla tiadi tulale, lani n tie ban guani bi nuni kuli a po ki leni o danligu taanyema leni fini maama ke, bi ya puni ba ki tinga leni tanpoli piama kuli, bi baa fali o ke waa pundi ban tiadi ba li po ki yie ke bi kan cedi a miabu ki go yaa kpiagidi a tiadima.

O n buadi ŋamo, n pali buado, guudi n miadi ha, o ŋoadikoa yua lingi a nunga, leni yaaba n yie a dabanpiemi leni yaaba n yie a moamoani kpaana. Cedi wan sedi a po cain, wan kpaani a yeli ki sieni o nuni a duagidima dieŋanli nni.

A tie imoamoani po, yua ki deli i fagidi faabada o niñingbadima buliñobu kani yaaba n bi tieni bi dandanli a kani, bi ki yie yaaba n lingi ha, n pundi a ŋanma luolu kani.

Tienu to ki ye ke laa tie fini, o fidu kuli daano, yua n kpedi boncianla, yua n faabidi fala nni, yua ya yenpagidi n yabi boncianla, yua ki pia ban mua leni o, yua tie imoamoani cain.

Firmness in the Covenant

Han ba ti pagidi, ô o diedo n Tienu ! N miadi ha a yeli yua ke a tieni yeli kuli yuli po, yua ya po ke tanpoli bonŋoaginkaala padi ke a ŋamu tiŋaagu ŋmabiga pudi au bianu kani, ki ñigidi leni a yeli yua n yabi, ki kpedi yenyenma, han pa nni a todima yua n ŋani ki go guudi nni a tayienu leni a guudima soangu nni.

N tie a tuonsoanpoa yendo, ô n diedo ! n jigidi ki nua a po, ki tieni n dugidi a kani. Cedi min ba mi todima ŋanma n buama a po nni leni han bua yaala tuonli nni maama ke a niba nni yaaba n ki bua ha yiema, bi a tagima nni bi fadanba lanbu n da fidi ki fagidi nni leni fini.

ŋuudi n tubili, ô n diedo, lani n tie min fidi ki gbadi ya walimu ke bi bi suani a po, yendi n pali leni a banma yenyenma, ki kadi n lanbu wan fidi ki ta a yeli ki go ya yiini a donda. A fidu po, ô n Tienu, n naano taani leni fini bebe, ke n pali mo lingi fini a bebe.

Tienu to ki ye ke laa tie fini, yua ya yenpagidi n yabi boncianla, yua puuni boncianla, yua puuni sugili, yua pia mi niñima.

Families

O Utienu, n Tienu ! n miadi ha, a paagima ñinciama po, a ŋanma tiŋaagu ŋmabiga yenyenma po, a yeli yua n ga a ŋoadikaaba po, a maama yua n pia mi libidima fidu po, a tidianmoanu yua yabi fidu po, leni a niñingbadima yua n liidi ya tagima n ye tanpoli leni tingi nni kuli po, han ŋuudi ki ñani n kani leni a ŋanma ñima, cuagili leni galima kuli, tadingu leni gaadima kuli.

A nua, ô n diedo, a ŋoadikoa yua miadi a ŋanma buliñobu kani, ki joani a ŋampaabu baabu kani, o tieni o dandanli a kani. Da yie o po, n miadi ha, wan mia yaala a todima kpenciamo kani leni a ŋanma yua dingi tiŋaagu ŋmabiga kani.

A pia o fidu ki ba tieni yaala n mani ha. Tienu to ki ye ke laa tie fini, yua n puuni sugili ki kaa fuo, yua ya ŋampaabu n yabi boncianla.

Firmness in the Covenant

A pala yi kuugi ki juagi, ô n Tienu, cuo a Dandanli mu po ke mi yanfuoma yi gobindi fundi A niali manu yani po ! Bi nipanba yaaba n cua yabi ki lingi mi guudima a taanyema soangu nni leni o ñuñulu n pia yaaba ke bi lingi, dinli dana yi te a dana, a ñinbuli yua puuni mi yema kaanu.

ŋalibalika ye leni yua jigidi a kani ki jegibi ki ba pundi a nunga yenyenma tiŋaagu ŋmabiga kani. ŋalibalika ye leni yua ke o buama kuli jigidi a jaanma tiŋafaama po leni a banma buli kani. ŋalibalika ye leni yua biani a sanu nni han puni yaala a paabu leni a todima po. ŋalibalika ye leni yua ke, o duoli ki baa pundi a kani po, yie yaala n ki tie fini kuli. ŋalibalika ye leni yua taani o yuli leni A ki ŋa lolima kuli, se Fini.

N miadi a, ô n Tienu, Yua n tie a yeli po ki nan fidi, a bali leni a fidu tuadi ŋanli po, ki fii li kadi dieli yuli po, han jagi yua kuli po yaala n dagidi leni a yabinu.

A fidu, imoamoani po, dagidi leni bonli kuli.

The Departed

O n Tienu, n canba, n buama kpajali ! nuanli a ŋoadikoa yua naabi ki ba guani a niñingbadima suangu nni ki go ba fuodi a ŋanma tawala tiipo, ki miadi a kubili leni a guudima.

N miadi a, ô n diedo, a nunbu yua n ki gua po, han da tuo n nuni n diidi o ba kuli kaa tie fini. Pa bi kpaagima o gbamanu, ban fidi ki gagidi a maalima ki go la a duagidima bianu. A tie yua ke O paalu, duagidima guli o fidu.

Tienu to ki ye ke laa tie fini, o paalu daano, yua n fidi, yua tie imoamoani cain.

Divine Springtime

Ti yenpagidi ye leni ha, ô ŋanduna n ba kuli diedo leni yaaba n sieda kuli buadi ŋamo ! A nua ke n ka li kpanli yua luagi o gaalu tiipo, a bani ke laa yienu nni mii gbali n tuonli yaala nua a jaanma bi mo yaala n tie ki yadi a dondili, ki kpaani a tuadiŋama leni ki togidi han diani n po yaala a walimu nni. Ba li kpanli n baani gbeni ki baa ba n yuli po yeni, n yi yaaba n bua ha, leni ya nialu ke bi pala yugi ki ca a jigi leni a yabinu bianu po.

ŋuudi bi tuba, ô n diedo, ban fidi ki gbadi i yanmani yi dingi ki ña a yenpagidi kpagili jienu po. N poli a fidu po ! yua n bua ki guani o tubili laa yani po baa yugi ki pundi a duagidima diema nni, laa diema yua ke tagima kuli kpaani ke a tie Utienu ke Tienu to ki ye ke laa tie fini, o gbamandanciamo, yua n todi fala nni, yua n ye o yuli po. ŋubidi, ô n Tienu, a ŋoadikaaba nuni ki go mangi ba leni a maama manu maama ke fala kuli kan fidi ki cedi ke bi kan jigidi a po ki guani bi nuni kuli a duagidima bianu.

Li siñuuli ŋoagini ki tinga kuli, ô n Tienu, ki cedi ke a ŋoadikaaba boncianla kuli jegibi. N miadi ha, a Yeli Yua n Yabi ki Cie po, han fiini dogu kuli nni tagi panma yua ke nani, wan jigidi, ki tiani a po a ŋoadikaaba siiga yeni, ba tandi a fidima caba o maama fidu leni o yanfuoma po ki go paadi leni yaala n tagi kuli.

A pia o gbamanu ki baa suani han bua maama. Tienu to ki ye ke laa tie fini, o fidu daano, yua ke bi niba kuli miadi o todima.

Detachment

Yedi : ti yenpagidi ye leni ha fini yua n cedi ke bi niŋanba kuli siedi bi tadingu a fidu duagidima yaala n yabi liiga, ke kawe kuli bandi o fanma a yenpagidi yua ki lebidi yenyencianma liiga.

N miadi fini a yeli yua n luodi tanpoli bulñona po ki gbieni leni li pamancianli tanpoli yaaba, han pa nni ya bulcindi ke n ba fidi ki suani a po dinla daali ki go pa nni o gbamanu min fidi ki ŋoadi a Tili sanbila.

A bani, ô n diedo, yaala n ye n niini, ama mii bani yaala n ye a niini.

A tie yua n bani li kuli, yua n pia labaali.

Children

N fundi a wuonli nni, ô n Tienu, li go pundi mo ke yua n lingi laa wuonkaanu n yaa ye a guudima kaanŋamu nni leni a diecianpaagu nni. Yendi n ninni, ô n Tienu, leni a tiŋafaama yenyencianma duagidima, nani han yendi n gbanu maama leni a ŋanma tiŋaagu yenyenma.

Children

N fii o tiŋaagu ne a ŋanma po ô n Tienu, ki go du a po cain, ki piani n yuli a guudima po, ki ñani n diegu nni. A niñingbadima tawala nni, jiini n po a ŋalibaliko ki pa nni o sanu min gua kuni leni laafia n deni, nani han puni nni o sanu maama ke n ñani a guudima nni, ke n yantiana kuli jigidi ki nua a po.

Tienu to ki ye ke laa tie fini, a bebe, yua ki pia biigima, yua bani li kuli, o yanfuodanciamo.